متفقناش علي كده !! بقلم عادل عبد الله

متفقناش علي كده
بقلم عادل عبد الله

كفاية حرام عليك مش قادرة، احنا اتفقنا علي واحد بس …

في يوم اتصل بيا شاب وقالي انه عايزني انضفله بيته، سألته هتكون فيه ست موجودة في البيت ولا لأ، لأن شرطي الوحيد من أول ما اشتغلت الشغلانة دي وجود ست في البيت علشان أدخل وانضفه وأنا مطمنة . قالي أن اخته هتكون موجودة لحد ما أخلص شغلي وأمشي كمان، وافقت وأتفقنا علي الأجرة والميعاد اللي هروح فيه بيته وأخدت منه العنوان.
وفي الميعاد المحدد روحت ، لكن بعد ما دخلت بيته أتفاجئت أن مفيش حد غيره في البيت !!
بدأت أخاف منه وقولتله أني لازم أمشي ومش هينفع أستمر في البيت بالوضع ده، لكنه أعتذر وقالي أن أخته أعتذرت في أخر لحظة وقالت أن عندها ظروف تمنعها .
أصريت أني امشي لكنه قالي أنه هيسيب البيت ويمشي يروح مشوار علشان مخافش وأشتغل براحتي لكن أهم حاجة أن الشقة تتنضف كويس جدا .
الصراحة هو كان شكله محترم وابن ناس وبيتكلم بصراحة، وده اللي شجعني أوافق لكن عرفته يرجع بعد ٣ ساعات و أني هقفل الباب من جوه لزيادة الأمان ، ضحك وقالي أنه موافق .
كانت ضحكته وابتسامته جميلة أوي ، باين عليه ابن ناس فعلاً .
وبعد دقايق كان الشاب بيخرج من البيت وأنا قفلت الباب من جوه وبدأت أغير هدومي وألبس هدوم الشغل اللي لازم تكون خفيفة علشان أخلص شغلي بسرعة.
لبست شورت قصير وتشيرت كت وبس علشان أكون خفيفة وأنجز . وبصيت علي البيت لقيته كان متسخ جدا ومحتاج شغل كتير فعلاً ، واضح أن الشاب ده عايش لوحده ومهمل جداً في نضافة بيته .
وبدأت شغلي وبعد ٣ ساعات خلصت شغلي و كان البيت زي القشطة، لكن كان أتهد حيلي بجد وتعبت جداً خاصة أن ضهري تعبان وبعالجه بسبب الشغل.
خلصت شغلي ولبست هدومي اللي كنت جاية فيها، وقعدت حوالي عشر دقايق قبل ما اسمع صوت جرس الباب ، ولما بصيت من العين السحرية عرفت أن الشاب رجع .
فتحت الباب ، وأول ما دخل كان باين الانبهار في عينيه، قالي برافو عليكي أنا مكنتش متخيل إنك شاطرة كده وهتنضفي البيت بالشكل ده .
قولتله طيب هات بقي أجرتي علشان أتأخرت علي الأولاد في البيت، لكني أتفاجئت أنه طلب مني أنضف بيته التاني اللي جنب بيته مباشرة، قولتله مينفعش لأني أتأخرت علي العيال ، قالي البيت التاني مش هياخد وقت وتعب زي ده لأنه مقفول دايما. قولتله أجيلك وقت تاني انما النهاردة مش هينفع لأني تعبت جدا وضهري قفش عليا وحاسة أني هموت من التعب .
لقيت ملامحه أتغيرت فجأة وقالي أنا هترجاكي ولا ايه يا بت أنتي ، مفيش فلوس الا لما تنضفي البيت التاني !!
قولتله يعني ايه !! أحنا أتفقنا علي بيت واحد بس .
قالي هو كده ، مفيش فلوس إلا لما تنضفي البيت التاني !!
قولتله كفاية حرام عليك مش قادرة، احنا اتفقنا علي واحد بس .
قالي هو كده مفيش فلوس الا لما تنضفي البيت التاني!!
حسيت من كلامه أنه فعلا من هيديني فلوسي إلا لو نضفت البيت التاني، أضطريت أني أقوله أني موافقة لكن صعبت عليا نفسي ونزلت دموعي غرقت وشي وأنا خارجة معاه من البيت علشان نروح البيت التاني .
كان وهو ماشي كل شوية يبصلي لحد ما دخلنا البيت التاني اللي كان كله تراب وكأنه مقفول من عشر سنين!!
أول ما دخلت وشوفته بالمنظر ده عرفت أني هتعب فيه جدا وأنا سنده ضهري بأيدي أنهرت وفضلت أبكي .
راح الشاب باصصلي وسألني أنتي تعبانة ومش قادرة بجد ولا بتمثلي ؟
قولتله يعلم ربنا أني مش قادرة حتي أقف .
لقيته طلع من جيبه ضعف الفلوس اللي اتفقنا عليها وقالي حقك عليا، أنتي صعبتي عليا بجد ، دي فلوس شغلك في البيت ده والتاني وهستناكي بعد يومين تيجي تنضفيه ، ولما تيجي ليكي ٢٠٠ جنية كمان علشان شغلك كويس .
أخدت منه الفلوس ومشيت وكنت فرحانة جدا أنه أخيرا حس بيا وبتعبي .