تزوجت اخو حبيبي بقلم عادل عبد الله 1

تزوجت أخو حبيبي
بقلم عادل عبد الله

الجزء الأول

” ألحقني يا يوسف أخوك حازم راح يخطبني وبابا وافق !! ”

كانت تلك الرسالة كافية ليسقط هاتفه من يده دون أن يشعر.
سأله زملاؤه في الغربة … مالك يا يوسف؟ ايه اللي حصل؟
مازال ينظر إلي هاتفه الملقي علي الأرض وكأنه لا يسمعهم، حاول يوسف أن يتماسك وعاد وألتقط الهاتف وأعاد قراءة الرسالة مرة اخري …
” ألحقني يا يوسف أخوك حازم راح يخطبني وبابا وافق !! أنا مش عارفة أعمل ايه؟ ”
أعاد قراءة تلك الكلمات عدة مرات، ثم أرسل إليها …
يوسف: أنت بتقولي ايه ؟ أنتي متأكدة من اللي بتقوليه ده ؟
شروق: أيوه متأكدة ، بابا كلمني امبارح بالليل وقالي أن حازم أخوك كلمه وطلب يخطبني وبابا موافق جدا وماما كمان .
يوسف: وأنتي عملتي ايه؟
شروق: قلتلهم أني مش موافقة لكن هما مصممين.
يوسف: معقول !! يعني حازم مش لاقي بنات غيرك علشان يخطب البنت الوحيدة اللي أخوه حبها!!
ياسمين: مش عارفة هو عمل كده ليه؟ ده حتي عمره ما حسيت منه بأعجاب أو لمح أنه معجب بيا أو أي حاجة من دي !!
يوسف: طيب خلاص يا شروق، أنا هكلم حازم وأفهمه كل حاجة وأكيد لما يعرف أننا بنحب بعض هيبعد ويلغي الفكرة دي من تفكيره.
ياسمين: وأنا هعمل ايه؟
يوسف: أنتي لازم تعرفيهم عندك إنك رافضة الأرتباط دلوقتي ، وأنا هحاول أنزل أجازة في أقرب وقت وأكلم أبوكي.

أنتهت المحادثة بينهما لم تنتهي بعد نيران الغضب التي تشتعل داخله.

اتصل علي الفور بأخيه حازم …
يوسف: ألو.. أزيك يا حازم ؟ أخبارك ايه؟
حازم: تمام كويس، أنت عامل ايه في شغلك؟
يوسف: معقول رايح تخطب يا حازم من غير ما تقول لأخوك؟!!
حازم: ايه ده؟ أنت عرفت أزاي؟!!!
يوسف: عرفت من العروسة نفسها يا أخويا.
حازم: من العروسة!! شروق هي اللي قالتلك؟!
يوسف: أيوه.
حازم: ليه؟ وأزاي؟ وتقولك حاجة زي دي ليه؟ أنا مش فاهم حاجة!!!
يوسف: معقول متعرفش أن أنا وشروق بنحب بعض؟!!
لحظات من الصمت قبل أن يسمع يوسف ضحكة حازم العالية التي سبقت كلمتة الأكثر صدمة حين قال : أنت كمان؟؟
كاد أن يفقد يوسف توازنه وحاول أن يستجمع قواه وسأله: يعني ايه ” أنت كمان؟” ؟؟
حازم: يعني أنا وشروق بنحب بعض يا يوسف.
يوسف: أنت أتجننت يا حازم؟ ايه اللي بتقوله ده؟!! أنا عارف ومتأكد إن شروق مبتحبش غيري.
حازم: لا يا يوسف أنت أكيد فاهم غلط ممكن تكون كانت بتكلمك علشان تتقرب مني أنا.
يوسف: لأ، شروق انا وهي بنحب بعض من زمان ومتفقين إني لما أرجع من السفر أتقدملها وأخطبها.
حازم: معلش بقي يا جو اللي سبق اكل النبأ.
يوسف” بصدمة”: يعني ايه؟
حازم: يعني أنا اللي سبقت يا يوسف، هارد لك ملكش نصيب المرادي.
يوسف: أنت أكيد بتهزر!! بقولك أنا وهي بنحب بعض ولازم تبعد أنت خالص.
حازم: أنا أتكلمت خلاص مع أبوها وتقريباً وقرينا الفاتحة .
يوسف: علشان خاطر أخوك يا حازم أرجع لأبو شروق وأعتذر له .
حازم: معلش أنت بقي علشان خاطر أخوك أبعد أنت وسامحني ، ماهو مش معقول هتاخد أنت كل حاجة وأنا ماخدش حاجة خالص.
يوسف” بدهشة”: يعني ايه؟ مش فاهم!!
حازم: يعني أنت أتربيت في حضن أبوك وأمك وأنا أتربيت معاكم بعيد عن أمي بعد ما أبوك طلقها، وأنت كملت تعليمك ودخلت الجامعة وأنا يادوب أخدت الدبلوم بالعافية، وأنت سافرت وبنشتغل بره وهترجع معاك فلوس اد كده وأنا شغال باليومية.
يوسف: وأنا ذنبي ايه في ده كله؟!
حازم: مش ذنبك حاجة، وأنا مش طالب منك إلا أنك تنسي شروق وتشوف شغلك ومستقبلك ولما ترجع شوفلك عروسة تانية.
يوسف: حتي لو أنا نسيتها هي مش هتنساني.
حازم: بيتهيألك يا يوسف، شروق زيها زي أي بنت كل اللي يهمها أنها تتجوز، واذا كانت هي فهمتك أنها بتحبك تبقي العبرة هي هتتجوز مين.
يوسف: الظاهر أن كلام التليفون مش هيجيب معاك نتيجة، أنا راجع مصر علشان أوضع حد للمصيبة اللي انت عايز تعملها دي .