عادت الي الحياة بقلم عادل عبد الله الجزء1

يجلس إيهاب في العمل وامامه بعض الأوراق ولكنه يبدو شارد الذهن يفكر في فقدانه لحبيبة عمره وزوجته سحر ويتم اطفاله الصغار وقلقه لوجودهم في المنزل وحدهم .
يلاحظ ذلك زميله مروان فيسأله : مالك يا هوبا ؟ كل شوية تتصل بالتليفون واشوفك سرحان وبتفكر ، قولي لو فيه حاجة أحنا اخوات .
إيهاب : يوسف وسيف اول مرة اسيبهم في البيت لوحدهم وخايف عليهم .
مروان : وليه مش سبتهم عند حد من قرايبك او قرايب مامتهم الله يرحمها ؟
إيهاب : لأ يا مروان مش عايز عيالي يتربوا ويشوفوا الشفقة في عيون كل اللي حواليهم عايزهم يطلعوا أقوياء و يعتمدوا علي نفسهم .
مروان : وليه بتقول كده ده حتي علي ما اعتقد بيت حماتك جنب بيتك علطول !!
إيهاب : ايوه فعلا بس انا عارف حمايا عصبي جدا ومش عاوز في مرة ارجع من الشغل اعرف انه ضرب حد منهم معرفش ساعتها ممكن أعمل أيه !!
مروان : لكن وجود طفلين لوحدهم في البيت في السن ده خطر جدا عليهم !!
إيهاب : في الأول بس انما لما يتعودوا هيكون شئ عادي .
مروان : معلش فيه سؤال عارف أنه مش وقته لكن عندي فضول اعرف انت مش ناوي تتجوز تاني ؟
إيهاب : أنا اتجوز بعد سحر ده مستحيل !! انت متعرفش يا مروان سحر كانت ايه بالنسبالي دي كانت مراتي و أم ولادي وقبل ده كله حب عمري ومفيش في يوم زعلتني مستحيل افكر اتجوز بعدها .
ثم يرن هاتف إيهاب فيجد المتصل سيف ابنه !!!
يرد عليه : ايوه يا سيوفه يا حبيبي فيه ايه ؟
سيف : بابا عايز انزل اشتري حاجة من تحت .
إيهاب : لأ مش احنا اتفقنا الصبح ان مفيش نزول الشارع خليكم قاعدين ولما ارجع هجيبلكم كل اللي انتوا عايزينه وكمان هاخدكم ونخرج نتفسح .
سيف : حاضر يا بابا .

في اخر اليوم يعود ايهاب الي منزله .
يدخل إيهاب من باب الشقة فيجد يوسف وسيف جالسين يلعبون سويا .
إيهاب : حبايب بابا وحشتوني اوي .

يجري يوسف وسيف عليه ويحتضنهما .

إيهاب : انا جيبتلكم الشيكولاته اهي بس استنوا لما نتغدا الأول ، انا هدخل اغير هدومي وادخل المطبخ اجهز اكل سريع .
يوسف : احنا أكلنا من شوية يا بابا .
إيهاب : أكلتم السندوتشات صح ؟
يوسف : لأ اكلنا مكرونة وفراخ .
إيهاب ” بتعجب ” : مكرونة وفراخ !!! وجات منين المكرونة والفراخ ؟
سيف : ماما هيه اللي طلعتها من التلاجة و عملتها وقعدت اكلتنا ولعبت معانا .
ينظر إيهاب لابنه سيف بحزن ثم يحتضنه بحنان ويقول : معلش يا حبيبي دي اكيد تهيؤات علشان ماما وحشتك ، بكره تتعود علي غيابها
ثم يترك ابنه ويتجه ناحية غرفة النوم .
يدخل إيهاب غرفة النوم فيجد الغرفة مرتبة بالكامل وملابسه مرتبة في أماكنها !!! ينظر إيهاب الي أنحاء الغرفة بتعجب ويتذكر أنه ترك ملابسه علي الفراش قبل ذهابه للعمل صباحا !!
يفكر من الذي دخل شقته وقام بترتيبها ؟؟؟؟
ثم يبدأ في تبديل ملابسه ويدخل إيهاب المطبخ ويتجه ناحية الثلاجة ويفتحها فيجد صنية كبيرة بها قطع من الفراخ المحمرة !!!!
ووعاءكبير مغطا ويرفع الغطاء عنه فيجد مكرونة مطهية جاهزة للأكل !!!!
ينادي بصوت عالي : يوسف ، سيف تعالو هنا بسرعة .
يدخل يوسف وسيف الي المطبخ ويقول يوسف : نعم يا بابا
إيهاب : مين اللي عمل الأكل ده .
سيف : قولتلك يا بابا ماما جات وعملتلنا الأكل .
يوسف : أيوه يا بابا ماما جات عملتلنا أكل وقعدت أكلتنا ومشيت .
إيهاب : مين اللي جه هنا يا يوسف وانا في الشغل قول الحقيقة علشان مزعلش منك .
يوسف : ماما .
إيهاب : قول الحقيقة يا يوسف ومتخاقش انا عايزك شجاع .
يوسف : والله يا بابا زي ما سيف قالك ماما جات وقعدت معانا وقعدت تلعب معانا شوية وبعدين عملتلنا الأكل و أكلتنا ومشيت .
إيهاب ” بتعجب ” : ماما جات أزاي أنتوا هتجننوني ؟
يوسف : ليه يا بابا ؟
إيهاب : مفيش مفيش ، طيب هيه جات امتي ومشيت امتي ؟
يوسف : جات بعد انت مشيت بشوية ومشيت قبل ما تيجي علطول .
إيهاب : طيب اسخن لكم الأكل معايا ولا شبعتوا ؟
يوسف وسيف في صوت واحد : لأ احنا شبعنا ومش جعانين .
إيهاب : طيب يا يوسف خد أخوك واطلعوا العبوا بره .
يخرج الطفلين و يقف إيهاب يسخن الطعام وهو في ذهول تام !!! يحاول ابجاد تفسير لما يقوله ابناؤه وما يراه بعينيه دون جدوي !!!