مكالمة منتصف الليل بقلم عادل عبد الله

: كنا هنعمله ؟؟!!! هو انتي غيرتي رأيك ولا ايه ؟!!!
: ايوه طبعا .ما دام حد عرف سرنا يبقي مش هنقدر ننفذ اتفاقنا .علي الاقل في الوقت الحالي .
: انتي بتتكلمي جد ولا بتلعبي عليا يا لولا ؟
: يخربيتك .هو ده وقت لعب !! انا بتكلم جد .انا خايفة اوي .احنا كده اتكشفنا وهنروح في داهية .
: ولا هنروح في داهية ولا حاجة .هاتي رقم التليفون اللي اتصلتي عليه بالغلط وانا هتصرف .
: هتتصرف ازاي بس يا منيل علي عينك .
: بطلي طولة لسانك دي وهاتي الرقم خليني اشوف هتصرف ازاي في المصيبة اللي عملتيها دي .
؛؛؛؛؛؛؛
يجلس نور يفكر بعدما اغلقت العشيقة الهاتف في وجهه .
اكيد هي دلوقتي هتراجع نفسها ومش هتنفذ جريمتها لما عرفت ان سرها انكشف .
واحتمال تعند وتنفذ جريمتها وتهرب . خصوصا اني معرفش هي مين ولا هعرف اوصلها .
وحتي لو مش هتنفذها دلوقتي ممكن تأجلها فترة من الوقت وبعدين تنفذها بردو .
انا كده كده لازم اتصرف واعمل اي حاجة انقذ بيها الرجل ده .
احسن حاجة اتصل بالشرطة واعمل بلاغ وهما يتصرفوا .
نزل نور وكانت الساعة بعد منتصف الليل بأكثر من ساعة وراح قسم الشرطة يقدم بلاغ .
: ايوه يا استاذ اؤمر .
: بعد اذنك يا فندم انا جاي اعمل بلاغ .
: في مين ؟
: انا جالي تليفون من رقم غريب وفهمت من اللي كانت بتتكلم انها هتنفذ جريمة مع عشيقها وتقتل جوزها .
: لأ بقي .واحدة واحدة عليا وفهمني بالظبط ايه اللي حصل .
حكي نور للظابط كل ما حدث بالتفصيل وبعدما استمع له حتي انتهي من كلامه قال له : طيب دلوقتي ايه دليلك ان كلامك ده حقيقي ؟ ما يمكن يكون بلاغ كيدي عاوز تنتقم به من واحدة انت تعرفها ؟
: لا يا فندم .اقسم بالله اللي انا قولته لسيادتك ده حقيقي وانا معرفهاش ولا اعرف هي مين ولا اي حاجة عنها .
: يا استاذ انا مصدقك لكن لازم يكون في دليل .
: وانا هجيب دليل علي كلامي ازاي ومنين ؟
: طيب خلاص انت كده عملت اللي عليك واحنا هنتصرف .
: هتتصرفوا ازاي يا فندم ؟
: ده شغلنا احنا بقي هنتتبع رقم التليفون ده ونعمل تحرياتنا . ده شغلنا واحنا عارفين هنعمل ايه .
: شكرا جدا يا فندم .
وبعد خروج نور من قسم الشرطة بلحظات رن موبايله وعندما رد عليه كان علي الطرف الاخر ناصر ….
: الو .مين ؟
: انت اللي مين ياض ؟
: طيب اتكلم كويس وقولي انت عاوز مين ؟
: انا عاوزك انت .
: وهو انت تعرفني ؟ انت لحد دلوقتي مقولتش انت مين ؟
: انت كنت بتعاكس خطيبتي من شوية في التليفون .
: انا ؟؟!!
: ايوه انت .
: اااااه . هو انت بقي عشيق الست اللي كنتوا ناويين تقتلوا جوزها .
: انت بتقول ايه ياض انت .لو متعدلتش في كلامك هزعلك .
: طيب اخلص وقول عاوز ايه ؟
: عاوزك متتصلش علي خطيبتي تاني . ويا ريت لو شايف نفسك دكر خليني اشوفك وانا اعرفك مقامك .
: انت بتعمل كده علشان تداري علي سركم اللي انكشف!!صح ؟؟ متخافش السر اللي بينكم بكره كل الناس هيعرفوه واولهم جوزها .
: يا ابن ………
قفل نور المكالمة بعد ما بدأ ناصر يشتمه بأبشع الالفاظ .
عرف نور ان المكالمة الغلط اللي جت له ممكن تكون سبب لكوارث كبيرة ممكن تحصله .
طلع نور بيته واول ما دخل لقي باباه كان صاحي علشان يصلي الفجر .
استغرب جدا لما شاف ابنه نور راجع من بره في الوقت ده !!!
: انت كنت فين يا نور ؟ انا لما نمت كنت انت في اوضتك !! نزلت ليه من البيت في الوقت ده ؟ وكنت فين ؟
بص نور لأبوه وقاله : صلي يا بابا الفجر ونام والصبح ان شاء الله هحكيلك علي كل حاجة .
: لأ . انا مش هرتاح ولا اعرف انام الا لما اعرف حصل ايه ؟
حكي نور لباباه كل اللي حصل من اول المكالمة الغلط لحد مكالمة العشيق .
ابو نور شجعه علي انه حاول ينقذ الزوج المسكين اللي كان ممكن يقتلوه المجرمين . و انه بلغ الشرطة وهي قادرة تتصرف لكنه حذره انه لازم يخلي باله علي نفسه خصوصا انه بعد ما كشف سرهم ممكن يحاولوا يأذوه او يتخلصوا منه .
نور طول الليل معرفش ينام لحد ما طلع نور الصباح وملا الدنيا .ونور بيفكر ازاي يوصل للناس دي خصوصا انه حس من كلام العشيق ان نيتهم فيها شر .
نور فطر ولبس ونزل يروح شغله وطول الطريق بيفكر في نفس الموضوع .واخيرا افتكر حاجة مهمة اوي وقال لنفسه ……
: ازاي كان غايب عن بالي .الواد هاني صحبي شغال في شركة محمول . انا هتصل به و اعرف منه عنوان سكن الست دي من تليفونها ومن العنوان هوصل لجوزها وانبهه واعرفه اللي بيحصل من وراه قبل ما يغدروا به . وكمان اعرف اسم وعنوان العشيق ده واشوف هقدر اعمل معاه ايه . علي الاقل ممكن اساعد الزوج الغلبان ده .
اتصل نور بصدبقه هاني وطلب يقابله ولما قابله عرفه باللي حصل وطلب منه انه يساعده في معرفة اسم وعنوان هذه السيدة وعشيقها .لكن صديقه قاله انه مش هيقدر يعطيه اي معلومات لان المعلومات دي مش بتخرج الا باذن من النيابة . والا ممكن يتأذي في شغله .
وبعد الحاح واصرار شديد من نور اضطر صديقه ان يعطيه اسمائهم وعناوينهم لكنه نصحه انه يبعد عن الموضوع ده ولا يبلغ الزوج بالموضوع حتي لا يحدث له مكروه .وان يترك الامر للشرطة التي ستقوم باللازم .
لكن نور كان جواه شئ بيدفعه لأقتحام حياة هؤلاء الاشخاص . وبالفعل ذهب نور الي عنوان سكن هذه السيدة وبدأ في السؤال عنها وعن زوجها من بعض الجيران ولكنه اكتشف حقائق مثيرة للغاية .
نور عرف ان الست دي اسمها لولا في العشرينات من عمرها وانها من اسرة فقيرة جدا وان جوزها اسمه خيري في الخمسينات من عمره . وانها الزوجة الثالثة له وانها اتجوزته غصب عنها .
وعرف كمان ان زوجها خيري بيعاملها معاملة سيئة جدا وبيضربها كل يوم تقريبا وبخيل جدا عليها رغم انه ميسور الحال ماديا . وعرف انها طلبت منه الطلاق اكتر من مرة وهو بيرفض .
بعد ما عرف المعلومات دي خاف نور يبلغ خيري زوج الست دي لأنه بشخصيته دي ممكن يقتلها . وبكده يبقي منع جريمة وكان سبب في جريمة تانية .
فكر نور كتير واتصل بصديقه هاني وقاله علي اللي عرفه وطلب منه يساعده ازاي يتصرف في الموقف ده ؟
في نفس الوقت ده كان ناصر بيفكر ازاي يتخلص من نور بعد ما قاله انه هيعرف زوج لولا بسر علاقتهم .
ناصر كلم لولا وقالها …..
: علفكرة يا لولا انا اتصلت بالرجل اللي كلمتيه وعرف سرنا .
: وبعدين عملت معاه ايه .
: هددني انه هيتكلم وهيقول للبيه جوزك .
: يا نهار اسود .يا مصيبتي السودا ياني .
: ميبقاش قلبك خفيف كده . هو هيوصله ازاي ؟
: لو عاوز يوصله هيوصله .
: ماهي دي اخرتها معاكي .
: هو ده وقت تقطيم .احنا في المصيبة اللي احنا فيها دلوقتي .
: وهو مين اللي وقعنا في المصيبة دي .المهم انا فكرت في حاجة هتريحنا خالص .
: قول .خلص .اتكلم .
: انتي هتكلمي الرجل ده .
: انا ؟؟ هكلمه اقوله ايه ؟
: هتكلميه وتتدلعي شوية عليه وتغويه لحد ما تتفقي معاه انكم تتقابلوا .
: وبعدين ؟
: هنخلص عليه .
: هتقتله .
: لأ . هنقتله . ايدك بايدي .احنا مع بعض في كل حاجة .الحلوة والمرة .
: بس انا مقدرش اقتل .
: ما انتي كنتي هتقتلي خيري معايا ؟!! هتفرق في ايه ؟
: لأ تفرق كتير .خيري عذبني وبهدلني وشوفت معاه الويل .
: والرجل ده كمان لو فضل عايش هتشوفي الويل اكتر و ممكن جوزك يموتك او هتدخلي السجن تضيعي شبابك فيه .
: لأ .لأ خلاص .انا موافقة .
اتصلت لولا علي نور و اتفاجئ نور بمكالمتها …
: الو
: الو .مين ؟
: انا اللي كلمتك من يومين مكالمة بالخطأ بالليل .
: ايوه ايوه .عاوزة ايه ؟؟
: انا بكلمك علشان اشكرك .
: تشكريني . تشكريني علي ايه ؟
: علي انك فوقتني في الوقت المناسب .
: ازاي يعني مش فاهم .
: لما كلمتك وعرفت سري خوفت اوي لتفضحني وقررت اني انهي علاقتي بالشخص اللي كنت اعرفه .
: فوقتك !! انتي بتشتغليني ولا بتتكلمي جد ؟
: انا بكلمك بجد ومن قلبي .انا كنت ماشية في طريق غلط وكانت اخرته وحشة اوي .لكن الحمد لله فوقت في الوقت المناسب .وده بسببك انت .
: اخرته وحشة !!! ده انتي كنتي هتقتلي جوزك يا هانم .
: لا لا لا .مين قالك كده .انت فهمت غلط .
: فهمت غلط ازاي ؟
: انا مكنتش هقتل جوزي . انا مقدرش اقتل عصفورة .انا كنت هقابل الرجل اللي كنت بحبه بس .علشان كده حطيت المنوم لجوزي علشان ميصحاش وهو موجود .
: ووصلت بيكي الجرأة انك تقابلي عشيقك في بيت جوزك ؟؟ وهو موجود كمان ؟؟!!! ده انتي جريئة اوي .
: انت متعرفش حاجة .قسوة جوزي عليا هي اللي خلتني اعمل كده .
: مهما كان . مفيش مبرر للي بتعمليه ده . كنتي اطلبي الطلاق منه لو مش عاوزة تعيشي معاه .
: طلبت منه الطلاق كتير وهو بيرفض .
: كنتي اعملي خلع . بصي مفيش مبرر للي بتعمليه مهما قولتي .
: عندك حق انا عارفة كويس .لكن الشيطان بقي هو اللي غواني .وعموما خلاص الموضوع ده انتهي خلاص .
: اتمني يكون فعلا انتهي .
: بس انا كنت عاوزاك توعدني انك متقولش لجوزي .انت متعرفش ممكن يعمل فيا ايه .
: خلاص اوعدك .بس انتي اوعديني انتي تنسي اللي كنتي بتعمليه ده وتعيشي حياتك صح .ولو مش قادرة تعيشي مع جوزك اطلقي او اخلعيه .
: اوعدك . بس عاوزاك توعدني وعد تاني .
: ايه هو ؟
: توعدني انك تفضل جنبي وتسأل عني ولو ضعفت تفوقني .
: ملوش لزوم .
:ارجوك . كمل الخير اللي عملته معايا .
: خلاص موافق .اوعدك .
خلص نور المكالمة مع لولا وبعدين دخل ابوه يسأله كان بيكلم مين .حكي نور لوالده عن مكالمة لولا له وكلامها معاه .
ابو نور حذره انه يكلم الست دي تاني لأنها ممكن تلعب به او تأذيه . وقاله سواء كانت الست دي صادقة او كدابه كفاية اوي كده علي الموضوع ده وينساه كأنه محصلش .
وكلم نور هاني صديقه و قاله عن مكالمة لولا له وحذره هاني نفس تحذير والده له .
بدأ يقتنع نور بكلامهم وفعلا مرت عدة ايام حتي اتصلت لولا بنور مرة تانية …….
: يعني مش اتصلت تطمن عليا زي ما اتفقنا !!!
: معلش كنت مشغول . وبعدين اتصالي ملوش لزوم .
: لا. اتصالك مهم اوي .انا عاوزاك جنبي خصوصا الايام دي .
: حاضر . هحاول .
: علفكرة الانسان اللي كنت علي علاقة به بيحاول يكلمني . وكل شوية يتصل بيا .
: وانتي عملتي ايه ؟
: انا اتهربت كتير من اتصالاته وفي الاخر رديت عليه وقولتله اني مش هرجع اكلمه تاني خلاص . بس انا خايفة اوي .
: خايفة من ايه ؟
: خايفة اضعف وارجعله تاني .
: قربي من ربنا وتوبي بجد هتلاقي ربنا يساعدك انك تبعدي عن اي حاجة غلط .
: انت طيب اوي يا نور .اول مرة اقابل حد طيب كده .
: مش طيب اوي يعني . الدنيا مليانة بالخير و في ناس اطيب مني بكتير .
: انا نفسي اشوفك بجد .
: صورتي موجودة علي الواتس اب .
: لا . انا نفسي اشوفك حقيقي مش في صورة .
: ليه ؟ !!!
: لسببين . اول سبب اشوف الانسان اللي فوقني وغير حياتي للاحسن بعد ما كنت ضايعة .
: والتاني ؟
: خليها مفاجأة احسن .
: مش بحب المفاجأت . قولي .
: معايا هدية ليك .
: ليا انا ؟
: ايوه .
: بمناسبة ايه ؟
: بمناسبة اللي انت عملته معايا .
: لا . انا معملتش حاجة . هو القدر والنصيب اللي عمل .
: بردو انا مش هنسي شهامتك ورجولتك وموقفك معايا .
: صدقيني انا معملتش حاجة .
: لكن انا حاسة انك عملت معايا احسن حاجة حصلتلي في حياتي .
: طيب سيبي الموضوع ده للظروف لأن انا ظروف شغلي الايام دي صعبة اوي .
: يعني افهم من كلامك انك رافض تشوفني او تاخد هديتي ؟
: لا بلاش تفهمي كلامي بالمعني ده .
: يبقي لازم اشوفك .
: ان شاء الله في اقرب وقت .
: امتي ؟
: نبقي نتفق لكن اليومين دول صعب اوي .