مكالمة منتصف الليل بقلم عادل عبد الله

: يعني مش هينفع نتقابل قريب ؟
: لا يا ناصر .واول ما ينفع هتلاقيني بتصل بيك وبكلمك علشان اقولك .
: انتي فين دلوقتي ؟ في اصوات كتير حولك زي ما تكوني في الشارع .
: ايوه اصل انا رايحه ازور اخت خيري علشان في المستشفي .
: اه .اخت خيري .ماشي يا لولا .كلك واجب يا قلبي .
: وعملتي ايه مع نور ؟
: لسه يا ناصر مفيش جديد .
: ماشي يا لولا لما نشوف اخرتها .
بعد المكالمة عرفت لولا من خلال صوت ناصر انه بيشك فيها وبيراقبها . فطلبت من سواق التاكسي بسرعة انه يتجه الي اقرب مستشفي !!
: دخلت لولا المستشفي وغابت فيها اكتر من نص ساعه ، اتصلت لولا بنور وقالتله ان ناصر بيشك فيها وبيراقبها وطلبت تأجيل اللقاء .
نور رجع البيت وهو بيفكر يا تري لولا فعلا ناصر كان بيراقبها ولا هي بتكدب عليه ؟
قعد نور مهموم وبيفكر كتير ومش قادر يتأكد اذا كانت لولا صادقه ولا بتكدب عليه .الشك كان هيموته .
نور قال لنفسه اذا كان من دلوقتي وفي موقف بسيط بيشك فيها ومش قادر يصدقها ازاي هيقدر يطمن يديها قلبه واسمه ومستقبله كله ويعيش معها .
نور اقتنع بالتجربة انه مش هيقدر يربط مستقبله بيها .
لكن رغم كده لازم يقف جنبها لحد ما حياتها تتغير للاحسن وتستقر .
لولا كلمت نور بعد ما روحت بيتها ….
: شوفت يا نور .
: ايه اللي حصل ؟
: ناصر شكله كان بيراقبني .
: وانتي عرفتي ازاي ؟
: عرفت من طريقة كلامه .
: واضح انك فاهمه ناصر كويس .وفي تفاهم كبير بينكم .
: افهم من كلامك ان دي غيرة ؟
: لا مش غيرة لكن هي دي الحقيقة .
: ناصر خلاص بالنسبالي انتهي وانا قولتلك السبب قبل كده .
: اومال خوفتي انه يكون بيراقبك ليه ؟
: لأنه ممكن يأذيني لو شافني معاك .
: بيتهيألي انك بعد ما تتطلقي تكملي معاه احسن يا لولا .
: انت عاوز تبعد عني يا نور ؟
: انا قبل كده وعدتك اني مش هبعد عنك الا بعد ما اطمن عليكي .اهم حاجة دلوقتي انك تعملي خلع من جوزك علشان تخلصي من الوضع ده .
: انا اهم حاجة عندي انت انك تكون جنبي .
: لو انتي فعلا مقتنعه ان اللي كنتي بتعمليه غلط وعاوزة حياتك تتغير وتمشي صح يبقي كل تركيزك انك تغيري الوضع الغلط اللي انتي عايشة فيه وبعدين تشوفي بعد كده هتكملي حياتك ازاي ومع مين .
سكتت لولا شوية .
وبعدين قالها : ساكته ليه ؟ كلامي صح ولا غلط ؟
: كلامك صح يا نور .
: تعرفي محامي يعملك الخلع ؟
: لأ .
: هشوفلك محامي انا من طرفي .
: وانا هروح فين دلوقتي ؟ معقول هرفع علي جوزي خلع وافضل معاه في نفس البيت !!
: شوفي مين من قرايبك تقدري تروحي تقعدي عندهم لحد ما ترتبي امورك .
: كل قرايبي مليش علاقه بيهم من زمان . ينفع تشوف لي انت مكان اعيش فيه مؤقتا .
: لأ مش هينفع . انتي لازم تقعدي عند حد يكون مصدر ثقة ليكي .حد من دمك يخاف عليكي .
: معنديش ثقة في حد اكتر منك .
: لأ . شوفي خالك او خالتك عمك او عمتك .اي حد من دمك يا لولا .انا مش هينفع .
: حاضر يا نور هشوف وابقي اقولك . وكمان هصرف منين يا نور ؟؟ انا مش عارفة اعمل ايه ؟
: لما نحدد الاول المكان اللي هتعيشي فيه وبعدين نشوف شغل يناسبك . انتي طبعا مش معاكي اي شهادة .
: لا يا نور انا خرجت من المدرسة من تانية ثانوي عام . انا كنت شاطرة اوي لكن بابا بقي الله يسامحه كان عاوز يجوزني وخلاص .
: طيب كويس اوي تبقي تشوفي اي شغل وتكملي تعليمك في نفس الوقت . صدقيني يا جميلة انا شايف حياتك ممكن تبقي حلوة اوي .
بعد يومين لولا كلمت نور وقالت له ان لها خالتها في اسكندرية اتصلت بها وقالت لها انها عاوزة تقعد عندها لفترة مؤقتة لحد ما تاخد حكم الخلع من جوزها وتلاقي شغل وترتب باقي امورها ، وان خالتها وافقت ورحبت اوي بيها خصوصا انها عايشة وحيدة بعد جواز ولادها وموت جوزها .
نور فرح اوي بالخبر ده وقالها انه كمان كلم محامي صديق له ووعده انه هيساعدها في الخلع بأقل مصاريف علشان ظروفها .
نور اشتري خط موبايل جديد وطلب منها انها توقف الخط القديم وتستخدم الخط الجديد علشان خيري وناصر مش يعرفوا يوصلولها .
لولا اتصلت بنور وقالت له انها لقيت شغل وانها جهزت الاوراق الخاصة بالخلع .وطلبت منه انها تقابله علشان يروحوا للمحامي وياخد منهم الاوراق الخاصة بالخلع .