مكالمة منتصف الليل بقلم عادل عبد الله

انهي نور مكالمته مع لولا و قعد يفكر . ياتري هي صادقة في كلامها معايا واتغيرت بجد ؟ ولا تكون بتكدب و بتلعب لعبة عليا ؟ مش عارف اعمل ايه ؟ خايف افضل اكلمها واقابلها زي ما هي بتطلب مني يطلع ملعوب كبير عليا . وفي نفس الوقت خايف ابعد تضعف هي وترجع تمشي في الغلط ويبقي ذنبها في رقبتي . مش عارف اعمل ايه .

في منزل لولا
خلصت لولا مكالمتها مع نور وبعدها علطول رن تليفونها وكان ناصر بيتصل بيها ……
: الو . كنتي بتكلمي مين كل ده ؟ بتصل بيكي من بدري بيديني مشغول.
: كنت بكلم نور .
: ها وعملتي ايه معاه ؟
: لسه شوية .
: لسه ايه ؟ مش عارفه تاخدي منه ميعاد تقابليه ؟
: لسه يا ناصر .
: اومال كنتوا بتتكلموا كل ده في ايه ؟
: بحاول اقنعه نتقابل بس هو مش موافق .
: انتي بتستهبلي بقي ولا الكلام معاه عجبك يا هانم ؟
: انت بتقول ايه ؟
: لا . حاسبي خلي بالك انا بغير عليكي اوي .يعني خلصي كده بسرعه خلينا ننتهي بقي من الموضوع ده .
: حاضر يا ناصر

وبعد عدة ايام
اتصلت لولا عليه مرة اخري ……

: صباح الخير ازيك يا نور .
: الحمد لله ازيك يا لولا انتي عامله ايه ؟
: محتجالك اوي يا نور .
: حصل حاجة جديدة ؟
: ناصر لسه بيحاول يكلمني وبتهرب منه بس مش عارفة هفضل اتهرب منه لحد امتي ؟
: معلش يا لولا حاولي تقاومي لحد ما يبعد عنك ولو مبعدش عنك انا هتصرف معاه .
: محتاجة اشوفك و اتكلم معاك كتير اوي .
: اتكلمي انا معاكي وسامعك .
: انا يا نور اتولدت في عيلة فقيرة اوي وغير فقر المال كان فقر المشاعر .طلعت للدنيا ملقتش حد حنين عليا ولا ام ولا اب . واول حد قابلته كان حنين عليا بجد كان ناصر علشان كده حبيته لكن ابويا ربنا يسمحه جوزني لخيري علشان كان غني . حتي بعد ما اتجوزته وقولت ده قدري ونصيبي لقيته قاسي عليا اكتر من الدنيا نفسها . ولما حاول ناصر يكلمني بعدها ضعفت غصب عني لأن هو الانسان الوحيد اللي لقيته فعلا حنين عليا .
: علشان كده كنتي عاوزة تقتلي جوزك ؟
: غصب عني مكنش في قدامي الا كده .
: كنتي هتعالجي غلط بغلط اكبر منه وتضيعي حياتك كلها .
: الحمد لله انك ظهرت في حياتي علشان افوق في الوقت المناسب . محتاجة اشوفك ضروري يا نور .
: حاضر شوفي الوقت المناسب ليكي امتي ونتقابل .
: اي يوم بالنهار ما عدا يوم اجازة جوزي .
: خلاص انا هشوف الوقت المناسب وهقولك قبلها بيوم .
؛؛؛؛؛؛؛؛؛؛؛؛؛؛؛
نور كلم صديقه هاني وقاله : دبرني يا صديقي مش عارف اعمل ايه ؟
: في ايه يا نور ؟ مالك ؟
: مش عارف اعمل ايه ؟ خايف افضل اكلمها واقابلها زي ما هي عاوزة يطلع ملعوب كبير عليا . وفي نفس الوقت خايف ابعد تضعف هي وترجع تمشي في الغلط ويبقي ذنبها في رقبتي . مش عارف اعمل ايه .
: وانت هتحمل نفسك ذنبها ليه ؟ المفروض ان انت اصلا بعيد عن الموضوع خالص .هي بقي تمشي صح او تمشي غلط هي المسئوله عن نقسها وسلوكها .
: انا عارف بس انا حاسس انها صادقة معايا ومش بتكدب عليا .ومادام القدر وقعها في طريقي يبقي انا عليا جزء من المسئولية في اني اكون سبب انها تبعد عن الحرام .
: لا يا نور . انت كده بتضحك علي نفسك . ابعد يا نور انا بعتبرك اخويا مش صحبي وبقولك ابعد عن الموضوع ده اخرته وحشة وانا خايف عليك .
ورغم اقتناع نور بكلام صديقه هاني الا انه ظل بداخله شئ يدفعه في اتجاه لولا ومتابعتها .
وبالفعل بعدها بيومين اتصل نور علي لولا ……..
: يااااه انا مش مصدقة نفسي !!!
: ليه ؟
: مش مصدقه ان انت اللي بتتصل بيا .انا دايما اللي بتصل بيك .
: خلاص بلاش اوعدك مش هتصل تاني .
: لا لا لا انا بهزر .
: عاملة ايه واخبارك ايه ؟
: الحمد لله .
: فاضية بكرة نتقابل ؟
ضحكت لولا اوي وقالت : لا لا مش ممكن . انا كده امي دعيالي .
: تاني انتي !! طيب بلاش .
: ايه يا عم انت .بتقفش ليه علطول كده ؟ انا بهزر معاك من فرحتي .
: طيب ايه ظروفك بكره هينفع ولا مش هبنفع ؟
: ينفع طبعا ما دام مناسب معاك .
: يبقي تمام نتقابل بكره الساعة ٥ بعد العصر ؟
: تمام .
: تحبي نتقابل فين ؟
: شوف انت ؟
: معرفش المكان اللي يبقي مناسب ليكي .
: بلاش الاماكن المفتوحة اوي علشان مفيش حد يشوفني .
شعر نور بالقلق من الجملة اللي قالتها لولا وسألها بقلق : اومال هنتقابل فين ؟
: مالك يا نور صوتك واضح فيه القلق ؟
: لا لا ابدا .مفيش حاجة .
: طيب خلاص نتقابل في كوفي شوب بعيد شوية علشان محدش يشوفني .
: تمام . فين الكوفي شوب ده ؟
: مفيش مكان محدد .انا بقولك انت شوف كوفي شوب بس يكون بعيد . المكان اللي تحدده انت .
وفي اليوم التالي استأذن نور ومشي بدري من الشغل وراح ؤقابل لولا .
اول ما شاف لولا اتصدم صدمة قوية جدا !!!
لولا كانت جميلة جدا بدرجة مكنش متخيلها . كمان عمرها واضح انها في بدايات العشرينات .
اول ما شافها سلم عليها وقالها : علي فكرة بجد حرام عليكي .
استغربت لولا وردت : حرام عليا ايه مش فاهمة .
: حرام عليكي تبقي حلوة كده وتعملي اللي كنتي بتعمليه ده .
: خلاص بقي .صدقني انا خلاص اتغيرت علي ايدك .كان ضعف بسبب ظروفي مش اكتر .
: مهما كانت الظروف يا لولا .
: يا نور انا امي ماتت وهي بتولدني واتربيت بين ابويا ومراته اللي كانت قاسية عليا اوي وشوفت علي ايديها الويل .حتي ابويا كان قاسي عليا ودايما يبقي في صفها . مشفتش حنية ولا حد اهتم بيا الا ناصر .ولما اتجوزت جوزي طلع قاسي عليا اكتر من ابويا ومراته .
: و ناصر دلوقتي هتعملي معاه ايه ؟ مش كنتي بتحبيه ؟؟!!!
: ناصر خلاص مبقاش الانسان اللي حبيته في البداية .في الاول كان طيب وحنين عليا انما بعد ما ابويا رفضه وجوزني لخيري اتغير اوي وشرب مخدرات وبقي انسان تاني غير االي حبيته .
: وهتعملي ايه مع جوزك ؟
: انا كلمته في موضوع الطلاق تاني وهو في الاول رفض وبعدين قالي اديني فرصة افكر ؟
: وتفتكري هيطلقك ؟
: لا . لكن حتي لو مش طلق انا هعمل خلع واتطلق منه .
: ممكن أسألك سؤال محرج شوية ؟
: اسأل براحتك . انت من حقك عليا تسألني عن اي حاجة ؟
: انتي وناصر حصل بينكم حاجة ؟
: بلاش السؤال ده بعد اذنك .
اتغيرت ملامح نور وظهر عليه الحزن .
حاولت لولا تغيير الموضوع و ابتسمت وسألته : وانت بقي اخبار الحب معاك ايه ؟
: مش فاهم !!
: يعني انت مرتبط وبتحب دلوقتي ؟
: لا .
: ليه كده ؟ ولا عمرك حبيت قبل كده ؟
: حبيت قبل كده بنت قريبتي من العيلة لكن هي اتجوزت لأن انا كان لسه المشوار قدامي طويل ومش جاهز للجواز .
: ونسيتها بسهولة ولا لسه بتحبها ؟
: لا طبعا . لكن مادام مش من نصيبي واتجوزت كنت لازم انساها . والحمد لله نسيت الموضوع بعد وقت مش طويل .