عادت الي الحياة بقلم عادل عبد الله الجزء2
ذهب ايهاب للطبيب النفسي وبدأ يحكي له تفاصيل ما حدث منذ يوم وفاة زوجته سحر حتي ما راه فوق سطح منزل اهلها ليلا ….
الطبيب : انا هكلمك بصراحة يا استاذ ابهاب كل الحاجات اللي بتشتكي منها دي لها اسم واحد في الطب النفسي وهو هلاوس سمعية وبصرية ودي ممكن تكون نتيجة صدمتك في فقدان زوجتك وكويس اوي أنك جيت لي في الوقت المناسب قبل ما حالتك تتفاقم وتتطور اكتر من كده .
ايهاب : يا دكتور لو هنفترض جدلا انها فعلا هلاوس سمعية وبصرية زي ما بتقول ، الاولاد اللي شافوها كمان عندهم هلاوس ؟؟
الطبيب : اولادك اطفال صغيرين زي ما فهمت من كلامك وفي العمر ده ممكن خيال الطفل يهيأ له اي حاجة بعيد عن الواقع والمنطق .
ابهاب : لا يا دكتور أنا أسف انا مش مقتنع أني مريض .
الطبيب : ولما انت معندكش استعداد تصدق انك مريض جاي تكشف عندي ليه ؟
ايهاب : علشان تعبت من اللي بشوفه يا دكتور ونفسي ارتاح .
ضحك الطبيب وقاله : مفيش مريض بيكون عارف ومقتنع انه مريض ، انا هكتبلك علي ادوية لما تاخدها هترتاح كتير وعايزك ترجعلي بعد اسبوعين .
حاول ايهاب أن يتناسي موضوع غرفة السطح و بدأ في تناول ادوية الطبيب بأنتظام لعدة أيام وظلت الاحوال هادئة داخل المنزل وكل يوم يسأل أطفاله اذا ما كانوا يرون أمهم مرة أخري وكان ردهم عليه دائما بالنفي .
حتي عاد ذات يوم ودخل الي المطبخ لاعداد بعض الطعام فوجد بعض اغلفة أطعمة الاطفال !!!
نظر اليها ايهاب بتعجب !! فهذه الأطعمة لم يشتريها ايهاب لأطفاله منذ فترة طويلة !! اذن من أتي بها الي المنزل ؟؟؟؟؟
أمسك ايهاب بتلك الاغلفة وخرج الي اطفاله وسألهم : مين اللي جاب الحلويات دي هنا ؟؟
نظر يوسف وسيف لبعضهما البعض في صمت وخوف ولما ينطقا بحرف واحد .
ايهاب : متخافوش انتو عارفين اني مبحبش الكدب ومعودكم ان محدش يكدب قولولي الحقيقة وانا هسامحكم انما لو كدبتوا هخاصمكم ومش هتكلم معاكم تاني .
يوسف : ماما هيه اللي جابت لنا الحلويات دي .
ايهاب ” بتعجب ” : ماما !!!
يوسف : أيوه يا بابا ، ماما اللي جابتها .
ايهاب : هيه ماما لسه بتيجي هنا وانا بره في الشغل ؟؟
يوسف : ايوه .
ايهاب : ومش قولتولي ليه لما كنت بسألكم كل يوم ؟
يوسف : خلاص يا بابا دي أخر مرة بعد كده هنقولك كل حاجة .
ايهاب : و ماما كانت بتعمل اي لما كانت بتيجي وانا مش موجود ؟
يوسف : كانت بتقعد معنا و بتلعب معنا وتجيبلنا أكل وبعدين وتمشي .
ايهاب : وقالتلكم ايه ؟
يوسف : مش بتتكلم خالص ، مش عارف ليه ؟؟ ولما بقولها وحشتيني يا ماما مش بتتكلمي ليه بتضحك وتسكت !!!
ايهاب : طيب يا حبيبي روحوا العبوا مع بعض وبعد كده متخبوش عني حاجة تاني .
كاد عقل ايهاب ان يجن من التفكير !!!
اتصل ايهاب بصديقه مروان .
