عادت الي الحياة بقلم عادل عبد الله الجزء2
ايهاب : شوفت يا عم مروان ؟
مروان : فيه اي تاني يا صديقي ؟
ايهاب : انا سمعت كلامك و كلام الدكتور وباخد الأدوية وشيلت اي تفكير من دماغي .
مروان : طيب كويس اوي .
ايهاب : لأ مش كويس .
مروان : ليه بقي ؟
ايهاب : النهاردة شوفت اغلفة حلويات اطفال في البيت عندي و انا مش اشتريت زيها للولاد من فترة طويلة ولما سألتهم قالولي أن ماماتهم جابتها لهم وانا في الشغل .
مروان : أنت بتتكلم جد ؟
ايهاب : ايوه وانا هكدب عليك ليه !!
مروان : أنت لازم تاخد اولادك وتروح للدكتور اللي بتتعالج عنده يتكلم معاهم وهو هيفهم منهم اذا كانوا بيقولوا الحقيقة ولا بيكدبوا او يجوز تكون اوهام برضو بسبب غياب امهم عنهم
ايهاب : أوهام اي يا مروان !! هي كل حاجة انت والدكتور تقولوا اوهام ؟؟ وبعدين ولادي هيكدبوا ليه في حاجة زي كده ؟! ده كانوا رافضين يعرفوني انها بتيجي وانا مش موجود لحد ما انا شوفت الحاجات دي بنفسي وضغطت عليهم علشان يقولوا الحقيقة .
مروان : الحقيقة يا صحبي الله يكون في عونك ، بصراحة الحل الوحيد اللي انا شايفه انك تراقب البيت وتعرف مين اللي ببدخل بيتك في غيابك ، ده لو فعلا فيه حد بيدخل وانت مش موجود ومش كلها اوهام .
ايهاب : انا متأكد انها مش اوهام .
مروان : لو مش اوهام هتبقي ايه ؟
ايهاب : احتمال تكون سحر مماتتش ولسه عايشة وده اللي انا بتمناه او الاحتمال التاني والاخير أن روحها هي اللي عايشة معانا ، انما أنا متأكد انها مش اوهام يا مروان ، أنت فاهم ؟؟
مروان : انا فاهمك وحاسس بيك ، لكن
حقيقي انا اتلخبطت ومش قادر اقولك نصيحة يا صديقي ، لكن كل اللي اقدر اقوله انك لازم تراقب البيت وربنا يوفقك وتوصل لنتيجة تريحك من كل اللي انت فيه ده .
ايهاب : وهراقب البيت ازاي وانا صعب جدا أخد اجازة من الشغل زي ما انت عارف ؟؟
مروان : تاخد ٣ ايام اجازة مرضية و تنزل كل يوم كأنك رايح شغلك عادي وتراقب البيت لحد ما توصل للحقيقة واذا كان فيه حد فعلا بيطلع بيتك وانت مش موجود ولا لأ .
ايهاب : الحقيقة اللي انا حاسس بيها ان روح سحر موجودة معانا في البيت وأهلها عارفين .
مروان : ازاي وانت سمعت بنفسك الشيخ محسن بيقولك ان بيتك مفيش فيه اي حاجة ؟!
ايهاب : معرفش يا مروان لكن ده اقرب تفسير للواقع اللي انا بعيشه انا وولادي الايام دي .
مروان : انا شايف ان مراقبتك لبيتك في فترات غيابك هو اخر حل في ايدك ، ولو موصلتش لنتيجة بردو ممكن تشوف شيخ تاني غير الشيخ محسن يروح البيت عندك ويشوف يمكن تكون فعلا روحها ساكنة البيت .
