عادت الي الحياة بقلم عادل عبد الله الجزء2
أرتدي الاطفال ملابسهم وأخذهم ابهاب وعادوا الي منزلهم .
وهناك …..
ايهاب : قولولي بقي هوه جدو ضربكم ؟
سيف : لأ مش ضربنا بس زعق لنا جامد اوي وخوفنا .
ايهاب : اي اللي حصل خلا جدو يزعقلكم اوي كده ؟؟ اكيد عملتوا حاجة غلط .
يوسف : لأ يا بابا مش عملنا حاجة ، جدو زعق علشان طلعنا نلعب فوق السطح .
ابهاب : سطح البيت ؟؟
يوسف : أيوه .
ابهاب : أكيد علشان خايف عليكم تلعبوا فوق لوحدكم .
يوسف : لأ يا بابا جدو كان فوق هو وتيتا ولما طلعنا وراهم نلعب زعقلنا جامد وكان هيضربنا ونزلنا جري انا وسيف و قعدنا لوحدنا تحت وهوه وتيتا كانوا فوق .
ابهاب : كانوا ببعملوا اي فوق السطح ؟؟
يوسف : معرفش ، بس احنا خوفنا اوي .
ابهاب : خوفتوا ليه يا حبببي ؟؟
يوسف : علشان كل ما نقول لتيتا اننا عايزين نطلع نلعب فوق جدو يزعلقنا ويقولنا اوعوا حد فيكو يطلع فوق ، اللي هيطلع فوق هد.بحه بالسك.ينة .
ايهاب : أنتوا طلعتوا فوق قبل كده ؟
يوسف : أيوه طلعنا مرة واحدة بس .
أيهاب : وعملتوا اي فوق ؟؟
يوسف : قعدنا نلعب انا وسيف وكنا فرحانين اوي لحد ما تيتا وجدو طلعوا وكانوا هيدخلوا الاوضة اللي فوق السطح ولما شافونا جدو زعق لنا جامد وتيتا نزلتنا الشقة وقعدوا هما فوق .
ايهاب : قعدوا فوق كتير ؟!
سيف : ايوه يا بابا وقعدنا انا ويوسف نعيط تحت لحد ما نزلوا .
ايهاب : وكانوا ببعملوا اي فوق السطح ؟
سيف : معرفش يا بابا .
ايهاب : طيب خلاص مش هنروح هناك تاني ، يلا روحوا ألعبوا مع بعض .
جلس ايهاب وحيدا يفكر في سر منع جد الأولاد وجدتهم لصعودهم أعلي سطح المنزل !!! وماذا كانا يفعلان داخل تلك الغرفة في الخفاء ؟؟!! يبدو من كلام الأطفال أن هناك سر غامض يخاف جدهم أبو سحر أن يكتشفه أحد !!!
مرت الليلة بسلام ولم يحدث أي شئ غير طبيعي .
في اليوم التالي ذهب ايهاب الي عمله ولاحظ زميله مروان عليه أستغراقه في التفكير فسأله : مالك يا ايهاب ؟ حصلت حاجة جديدة في البيت عندك ؟
ايهاب : لا لا محصلش حاجة .
مروان : اومال مالك شكلك مشغول اوي وسرحان في ايه ؟؟
ايهاب : موضوع بسيط بس شاغلني شوية .
مروان : لو مش حاجة خاصة ممكن تقولي يمكن اقدر اساعدك بدل ما انت بتفكر لوحدك .
ايهاب : انا عرفت ان فيه اوضة فوق سطح بيت حمايا .
مروان ” يضحك ” : ودي فيها ايه ؟؟ اغلب البيوت بيكون فيها أوضة فوق السطح !!!
ايهاب : الغريب ان حمايا وحماتي بيمنعوا اي حد يطلع الاوضة دي زي ما يكون فيها سر مش عايزين حد يعرفه !!
مروان : وانت شاغل نفسك ليه بحاجة زي كده !! البيوت اسرار يا عم ومادام حاجة مش تخصك متشغلش بالك بيها .
ايهاب : ده لدرجة انهم كانوا هيضربوا الاولاد لما طلعوا فوق السطح !!
مروان : بص يا صحبي لو خايف علي ولادك من حاجة هناك بلاش يروحوا هناك خالص .
ايهاب : مش مسألة خوف ، الموضوع ان فيه سر في الاوضة دي بيخلي حمايا وحماتي بس هما اللي بيطلعوها ويمنعوا اي حد غيرهم يطلع فوق .
مروان : برضو هتقولي سر ؟؟
ايهاب : بصراحة انا حاسس ان السر ده مرتبط بسحر مراتي .
مروان : سحر مراتك !!! الله يرحمها ، لكن سر ايه اللي مرتبط بيها بعد موتها وانت شوفتها ميتة ودفتها بنفسك معاهم !!!
ايهاب : هو ده الشئ اللي هيجنني !! افكار كتير بتخطر علي بالي بس مفيش حاجة منها مؤكدة او عليها دليل .
مروان : افكار زي اي ؟؟
ايهاب : حاجات كتير اولهم ان يكون حمايا بيحضر ارواح او عفار.يت وده اللي سبب الحاجات الغريبة اللي كانت بتحصل في البيت عندي .
مروان ” يضحك ” : ارواح اي يا عم !! مش معقول طبعا يكون زي ما بتقول كده ، علي الاقل كنت انت عرفت حاجة زي دي طول السنين اللي فاتت .
ايهاب : لو حمايا مش بيحضر ارواح تبقي سحر لسه عايشة ومخبيها في الاوضة دي .
مروان : لأ انت كده اعصابك تعبانة بجد ومحتاج تغير جو ، ازاي هتكون مراتك لسه عايشة يا ابهاب بعد ما انت بنفسك كنت معاهم وهما بيدفنوها و كمان ليه هيخبوها ؟! مفيش داعي لكل ده ، اسمحلي يا ايهاب كتر تفكيرك خلا دماغك شتت .
ايهاب : فعلا انا هتجنن من التفكير .
مروان : ولا تشغل بالك خالص لأن كل اللي بتفكر فيه ده بعيد عن المنطق والواقع ومجرد اوهام مسيطرة علي تفكيرك .
ايهاب : انا لازم اطلع واشوف بنفسي اي السر اللي مخبيينه فوق سطح البيت !!!
