ملاذ 2
الفصل السادس
تقدم أمير نحوه ووقف بجانب تالا بعدما وضع الطعام على الطاولة قبل أن يجيب أخيه على سؤاله :
” جاي عشان اشتري شوية حاجات ..”
” والبت دي بتعمل معاك ايه هنا ..؟!”
رد أمير عليه بحدة :
” متقولش بنت ، تالا تبقى مراتي ..”
نظرت إليه تالا بينما اتسعت عينا كرم بعدم تصديق :
” اتجوزت الخدامة يا أمير …؟!”
نهره أمير :
” قلتلك تالا بقت مراتي ، ياريت تتكلم عنها بإسلوب احسن من كده ..”
” اسف مكانش قصدي بس ..”
صمت كرم قليلا وهو يتأملها بملامح تائهة قبل أن يهتف به :
” بس امتى اتجوزتها وازاي ..؟!”
أخفضت تالا بصرها أرضا بينما تنهد أمير وقال بإختصار :
” اتجوزتها وخلاص ، من يومين ..”
” طب ومقلتش ليا ليه ..؟!”
” مخلاص يا كرم ..”
قالها أمير بنفاذ صبر ليرد كرم بضيق :
” تمام براحتك ، بس خلي بالك من ردة فعل اهلك لما هيعرفوا بجوازك منها ..”
قال أميرة بنبرة قوية غير مبالية :
” أظن إني كبير بما فيه الكفاية عشان احدد قرار زي ده ، انا حر ومن حقي اتجوز وقت ماحب …”
أومأ كرم برأسه وتركهما عائدا الى الطاولة التي يوجد أصدقائه عليها بينما
جلس أمير امام تالا الشاردة لينادي عليها :
” تالا ، رحتي فين ..؟!”
أفاقت تالا من شرودها وقالت :
” انا هنا ، هو انت ليه قلتله اني مراتك ..؟!”
عقد حاجبيه متعجبا :
” امال اقوله ايه ..؟!”
ردت بحيرة :
” مش عارفة ، بس انا توقعت انك هتقوله حاجة تانيه ..”
قال أمير بلهجة باردة شعرت تالا ببرودتها :
” انا معملتش حاجة غلط عشان أخبيها يا تالا ، انت مراتي شرعا وقانونا …”
أومأت برأسها وقالت بإعتذار :
” انا اسفة ، مكنتش اقصد ادايقك..”
رد عليها بهدوء :
” حصل خير …”
ثم أردف بجدية :
” خلينا ناكل بقى قبل ما الأكل يبرد …”
ابتسمت له وشرعت في تناول طعامها بينما نظر هو اليها للحظات قبل أن يشرع في تناول طعامه هو الاخر …
………………………………………………………………………….
فتح أمير الباب وولج الى الداخل وهو يحمل العديد من الأغراض تتبعه تالا التي تحمل جزءا بسيطا منها …
وضع أمير الأغراض أرضا واتجه نحو الباب ليغلقها بينما بدأت تالا تفتح الأكياس وتخرج منها أغراضها …
عاد أمير إليها وأخذ يتطلع إليها بينما هي تجلس على أرضية الغرفة تقلب أغراضها المتناثرة حولها ..
